Kryeministri Edi Rama ka fluturuar drejt Katarit, një prej vendeve të pasura të Gjirit, ku prej atje ka përcjellë foton e takimit me Emirin Tamim bin Hamad Al Thani.
Sipas njoftimit zyrtar, ka qenë pikërisht një ftesë e këtij të fundit për shefin e qeverisë që të vizitojë Doha-n
“Gjatë takimit, bashkëbiseduesit vlerësuan marrëdhëniet e mira mes dy vendeve, si dhe shprehën angazhimin e tyre për të thelluar bashkëpunimin në fusha me interes të ndërsjellë, kryesisht në turizëm dhe infrastrukturë.
Gjithashtu, zhvillimi i turizmit dhe i tregtisë së ndërsjellë, u theksua si prioritet”, thuhet në njoftimin zyrtar.
Kujtojmë që javë më parë, Rama realizoi një vizitë në Arabinë Saudite, ku nënshkroi shumë marrëveshje bashkëpunimi me Mbretërinë. Shefi i qeverisë ka vizituar më parë dhe Emiratet e Kuvajtin, në përpekje për të përfituar nga bashkëpunimi me vendet e pasura të Gjirit.
Kujtojmë se gjatë kohës që qeveriste Bashkinë e Tiranës, paraja arabe ka qenë mjaft prezente në shumë projekte, siç ndodhi dhe gjatë përmbytjes së një pjesë të kryeqytetit pas hapjes së digës së Liqenit Artificial në vitin 2002, ku një shoqatë arabe morri përsipër financimin e rehabilitimit të të gjithë dëmeve në shtëpitë e përmbytura të qytetarëve. /tesheshi.com/
