Në komunikimin e tij javor në FB, kryeministri Edi Rama ka bërë të ditur katër largimet në qeveri dhe arsyet përse ata ikin.
Sipas shefit të ekzekutivit shqiptar, ikja e Saimir Tahirit, Blendi Klosit, Ilir Beqajt dhe Blendi Çucit, nuk kanë të bëjnë as me protestën e opozitës e as me ndonjë kushtëzim nga aleati Meta, të cilin e vlerësoi për respektimin e pozicionit të tij kushtetues për të emëruar dhe liruar çdo ministër.
Rama sqaroi se katër ministrat ikin për arsye të brendshme politike, pasi do jenë udhëheqës të fushatës elektorale në zona të ndryshme.
Madje sipas Ramës, largimi i tyre nuk lidhet as me cilësinë e punës, pasi që të katërt, e sidomos Saimir Tahirin, i vlerësoi si të sukseshëm në detyrat përkatëse. Këtë të fundit e quajti edhe kampion suksesi.
Ndërsa për opozitën dhe protestën e saj trejavore deri më tani, Rama nuk tha asgjë më rëndësi dhe nuk përcolli asnjë mesazh për kompromis.
Përkundrazi, shpotiti çadrën dhe muzikën brenda saj, të cilën e cilësoi nën nivelin mesatar të muzikës së klubeve të natës në Tiranë. Duke e lidhur me këtë, Rama e mbylli fjalimin e tij javor me thënien e adaptuar “muzika le të vazhdojë, karvani ec përpara”. /tesheshi.com/
