Fjalimin e tij javor të së dielës në Fb, kryeministri Rama ia ka kushtuar sërish bojkotit opozitar. Ai ka shprehur pezm për fatin e PD duke konkluduar se: “….ndryshe nga katër vjet më parë, kemi përballë jo një qeveri të diskredituar, po një opozitë të konsumuar. Të njëjtët njerëz që e çuan Shqipërinë në rrugën e rrënimit, po e çojnë Partinë Demokratike në rrugën e asgjësimit”.
Rama më tej ka thënë se e gjitha kjo, i dedikohet pikërisht Lulzim Bashës, që sipas tij ende në kaq vite politike nuk ka mundur të lërë një gjurmë për mirë në të gjitha llojet e pushteteve dhe posteve që i janë besuar.
“Lulëzim Basha ka bërë një dëm të madh dhe kjo është e vetmja arsye që ma bën bindjen të paplotë. Sot do të doja ta shpjegoja këtë gjatë Komunikimit Javor, por vendosa të mos e bëj. Dua ta lë Lulëzim Bashën të qetë në këto 48 orë të fundit, të cilat vendosin nëse Partia Demokratike do të marrë kthesën e shpëtimit apo do të tretet në humnerën e vetëshkatërrimit”.
Por Ramën, nuk ka pse mos shpresohet.
“Mbetem natyrisht i gatshëm ta pres kryetarin e PD-së në çdo moment, për të negociuar rikthimin e partisë së tij në fushën e betejës demokratike të 18 qershorit. Përndryshe Partia Demokratike kështu siç e njohim, do të jetë më shpejt se vonë një kujtim i së kaluarës”, ka theksuar Rama. /tesheshi.com/
