Ashtu siç pritej, kryeministri Edi Rama ia ka kushtuar fjalimin javor aksionit të shpallur politik të opozitës me bllokim aksesh rrugore të hënën për një orë. Sipas Ramës, me këtë veprim opozita po tenton t’i vërë dhe flakën Shqipërisë, mjaft që mos ketë politikanë të ndëshkuar nga drejtësia.
“Ata që ftojnë njerëzit që të bllokojnë rrugët duan të na kthejnë në tatëpjetën e rrëmujave e të konflikteve, vetëm e vetëm se janë gati t’i vënë flakën përsëri Shqipërisë që të mos ndizet drita e drejtësisë në këtë vend, që të mos hapen kapakët e rëndë të zullumeve e të krimeve të pandëshkuara. Që të mos shpëtojë më në fund ky popull nga zgjedha e kulturës së pandëshkueshmërisë së njerëzve të veshur me pushtet e të zhytur në para të zeza”, theksoi Rama.
Ndërsa nga ana tjetër, shefi i qeverisë paralajmëroi ndëshkim ligjor për çdokënd që do tentojë të bllokojë rrugët.
“Policia e Shtetit ka për detyrë të dokumentojë çdo shkelje të ligjit dhe ka për detyrë të çojë para drejtësisë këto që shkel ligjin. A ia vlen të përfundosh në bankën e të akuzuarit për të mbrojtur politikanë dhe gjykatës të korruptuar. A ia vlen të akuzohesh si keqbërës i popullit dhe vendit tënd për t’i zënë rrugën drejtësisë që të duhet ty dhe familjes tënde duke mbrojtur ata që nuk duan të kenë drejtësi as për ty sepse i friken drejtësisë si djalli temjanit mbi ta”, shtoi më tej kreu i mazhorancës. /tesheshi.com/
