Përfaqsuesja e lartë e politikës së jashtme të BE-së, Frederika Mogherini, i ka përcjellë një mesazh nga Brukseli klasës politike shqiptare, duke u shprehur: “Palët politike kanë përgjegjësi për të vënë në zbatim reformën. Ne do mbështesim Shqipërinë në këtë proces”.
Deklarata e kryediplomates europiane u bë pas një takimi të saj me kryeministrin Rama, ndërkohë që ky i fundit ka premtuar angazhimin e dyanshëm për të çuar përpara projektin e reformës në drejtësi.
“Vlerësoj shumë kontributin tuaj të rëndësishëm. Prania ime këtu konfirmon përkushtimin dypalësh për të vazhduar përpara dhe për të bashkëpunuar sa më ngushtë për reformën madhore”, ka deklaruar Rama, që më pas veçoi ligjin e vetting-ut si një hap të rëndësishëm për realizimin në terren të reformës.
Ndërsa komisioneri për Zgjerimin, Johannes Hahn, i cili po ashtu u takua më Ramën në Bruskel, në fjalën e tij ka theksuar se, “qëllimi i reformës nuk është të afroheni më shumë me BE-në, por për t’i shërbyer sa më mirë qytetarëve shqiptarë”.
“Dhe kur BE kontribuon në këtë gjë nuk e bën vetëm për të afruar sa më shumë Shqipërinë me Unionin, por e bën në interes të shqiptarëve”, ka thënë zyrtari i lartë europian. /tesheshi.com/
