Kryeministri Rama tha se nga Berlini nuk ka marrë asnjë mesazh për shtyerje zgjedhjesh, siç përflitet tek-tuk te media pranë opozitës.
Me këmbëngulësinë se nuk do ketë asnjë shtyrje zgjedhjesh, e aq më pak pengim të tyre, shefi i mazhorancës paralajmëroi opozitën se do ta pasojë keq e më keq me rrugën e nisur, aq më tepër që sipas tij nuk ka asnjë mbështetje ndërkombëtare.
“I ka ardhur fundi variantit të lojës në gjuhë të huaj sepse nuk ka më njerëz që i besojnë atyre që prodhojnë katran të cilët kanë shpërndarë nëpër botë më shumë bojë se në dhjetë vite të marra së bashku. Në këmbim kanë marrë vetëm refuzimin e një maskarade të poshtër dhe po vazhduan kështu do marrin edhe izolimin total nga bota demokratike. Kujtojnë se do prodhojnë dëshmorë duke provokuar rendin, i cili në kohën e tyre përgjigjej me kallashnikov.
I gënjen mendja se do të ndalojnë Shqipërinë të bëjë zgjedhje vendore, por s’kanë gjetur asnjë budalla në botë që t’i takojë dhe jo më t’i dëgjojë.
Me gjithë broçkullat që u thanë për Samitin, apo që mua do më tërhiqet veshi që të shtyja zgjedhjet, u them se nuk më zuri veshi asnjë kërkesë të kësaj natyre. Zero fjalë për të shtyrë zgjedhjet. Në demokraci askush nuk është i detyruar të hyjë të zgjedhje me zorr. Nuk është detyra e qeverisë të fusë në zgjedhje partitë që nuk duan”, tha Rama në mbledhjen e grupit parlamentar socialist.
Ndërsa sa i përket negociatave, Rama tha se në shtator pritet çelja e tyre
“Është folur për shtatorin nga pala gjermane por kurrsesi për mosçeljen e negociatave për ndonjë arsye që lidhet me Shqipërinë”, theksoi kryeministri. /tesheshi.com/
