Duke folur në një takim të fondacionit “Friedrich Ebert” në Berlin, kryeministri Rama ka cekur çështjen e mosliberalizimit të vizave për Kosovën. Pasi i ka thurrur ditirambe BE-së, si një garanci për paqe e stabilitet, shefi i ekzekutivit shqiptar ka gjetur rastin për t’i kujtuar Europës një padrejtësi që sipas tij po u bëhet kosovarëve.
“…Kosova është i vetmi vend në të gjithë kontinentin, njerëzit e të cilit e kanë të ndaluar të lëvizin lirisht pa liberalizimin e regjimit të vizave. Njerëzit me të drejtë pyesin: Si ishte e mundur të shkonim në Gjermani pa viza, me pasaportë jugosllave, kur ishim nën diktaturë dhe tani që jemi një vend i pavarur nuk mund të dalim jashtë kufijve tanë?!”, tha Rama pasi ka vlerësuar hapat që po bëhen dhe gadishmërinë e palës shqiptare për të kthyer pllakën e historisë në raportet me serbët.
Më tej, kryeministri shqiptar i ka kujtuar Europës vëmendjen që duhet të ketë ndaj rajonit të Ballkanit dhe faktin se tek ajo ka shumë shpresë, sidomos nga faktori shqiptar. Ai ka lwnë të nënkuptuar se rusët janë tek porta.
“Ne nuk jemi duke rendur drejt anëtarësimit, por jemi gjithmonë e më shumë të dëshiruar për të mos humbur perspektivën europiane, si i vetmi horizont në sytë e njerëzve tanë, sepse do të ishte tepër vonë, nëse forcat antieuropiane do të zinin rrënjë në rajon. Mund të pyesni, – vërtet e keni seriozisht që jeni kaq shumë pro europianë sot, kur çdokush do që të dalë, ju do doni të hyni?! Por, mendoj se, është pak më shumë e ndërlikuar dhe më pak sipërfaqësore se kaq. Për ne, Europa ka të bëjë me diçka shumë më shumë të rëndësishme, ka të bëjë me të ardhmen, paqen dhe sigurinë. Për ne do të thotë të ndërtosh të ardhmen mbi të pamundurën e të shkuarës”, tha Rama. /tesheshi.com/
