“Kosova është një çështje për të cilën fare nuk pajtohemi, ngase qëndrimi im është që sa më shpejt që Serbia ta njohë Kosovën, aq më mirë do të jetë për të gjithë. Por, në të njëjtën kohë është një proces të cilin unë plotësisht e mbështes, e ky është dialogu i cili është një mjet shumë i rëndësishëm në të cilën në bazë do të ndërtohet e ardhmja”, tha Rama në debatin me kryeministrin serb Aleksandar Vuçiç, lidhur me marrëdhëniet serbo-shqiptare.
Në lidhje me mosmarrëveshjet në mes të Beogradit dhe Prishtinës rreth Trepçës, Rama tha se Trepça ndodhet në territorin e Kosovës dhe ajo i takon qytetarëve të Kosovës.
“Njerëzit duhet të kuptojnë se miniera e Trepçës ndodhet në territorin e Kosovës dhe ajo i takon qytetarëve të Kosovës, pavarësisht a janë serbë apo shqiptarë”, tha ai.
Përveç kësaj, Rama tha se është koha për të gjitha vendet në rajon të pushojnë të jenë peng i së kaluarës dhe për të modernizuar shoqëritë e tyre.
Në hapjen e Forumit të Sigurisë në Beograd, Rama tha se procesi i integrimit evropian është rrugë për modernizimin e shoqërisë, që është më e rëndësishme se anëtarësimi në BE, ngase ajo ndihmon në ndërtimin e institucioneve, sundimin e ligjit dhe funksionimin e demokracisë.
“Njerëzit në këtë rajon mund të kenë mendime të ndryshme për Ëashingtonin, Brukselin, Moskën, por duhet të kuptojnë se nuk ka asnjë mekanizëm tjetër që do të na mundësojë të dalim nga rruga e historisë e cila nuk po na shkon për dore, dhe që përfundimisht të modernizohemi dhe të jetojmë në kohët moderne “, tha Rama, i cili së bashku me kryeministrin e Serbisë hapi forumin e gjashtë të sigurisë në Beograd.
Sa i përket reformës së gjyqësorit në Shqipëri, Rama tha se është bërë një punë që ka qenë e paimagjinueshme për këtë vend: të kryejë reformën kushtetuese dhe të miratojë një sërë ligjesh që kanë ndërprerë në mënyrë radikale lidhjet me të kaluarën e keqe.
“Dhe për të gjithë është e qartë një gjë, që kjo nuk do të ishte e mundur pa mekanizmin e integrimit evropian”, theksoi Rama, njofton B92. /tesheshi.com/
