Vizita e Ramës në Athinë është karakterizuar nga foto me dicitura, në trajtë mesazhesh të thata, pa përbërë “lajm të madh”, siç në rastin e Turqisë, edhe nga fakti se dy vizitat kanë qenë në natyrave të ndryshme.
Fillimisht, Rama është takuar me kryediplomatin Nikos Dendias, ku nga ky i fundi u shkrua: “U takova me kryeministrin e Shqipërisë, Edi Rama. Marrëdhëniet mes dy vendeve, perspektiva e Shqipërisë në BE dhe zhvillimet e fundit në rajon në fokus të bisedës”.
Më pas, ishte Rama që përcolli një status pas takimit me homologun Mitsotakis.
“Falenderues për shijen e shkëlqyer të mikpritjes në shtëpinë e kryeministrit Mitsotakis, ku bëmë një bilanc të situatës me Covidin, marrëdhënies mes dy vendeve tona dhe problematikave rajonale! Vullnet i plotë për ta zhvilluar bashkarisht më tej këtë marrëdhënie strategjike”.
Kjo do pasohej nga një tjetër status: “Në Athinë për një drekë pune me Kryeministrin Mitsotakis, për të diskutuar koordinimin e mëtejshëm në luftën e përbashkët kundër COVID19; forcimin e mëtejshëm të marrëdhënieve strategjike midis dy vendeve; bashkëpunimin rajonal dhe integrimin evropian të rajonit tonë”.
Kujtojmë se Rama ka bërë një kthesë në raportet me Greqinë, ku fillimisht vendosi të tregohej i ashpër me politikën e Athinës, e pas uljes për ta rishqyrtuar Paktin Detar të rrëzuar nga Kushtetuesja, nisi të bëhej më luajal.
Ndërsa në politikën e brendshme eliminoi Himarën si vatër filogreke duke e futur në hartën e Labërisë në reformën e re territoriale, e gjithashtu ç’faktorizoi Vangjel Dulen dhe PBDNJ-në e tij.
Tashmë, po luan dhe një rol ndërmjetës, zgjedhur nga Erdogan, për përafrimin mes Turqisë dhe Greqisë në krizën mes këtyre dy vendeve. /tesheshi.com/
