Ashtu siç drejt tij u qëllua me këpucë në seancën e fundi të parlamentit të vitit që shkoi, një akt i kryetares së LSI-së Monika Kryemadhi, ashtu dhe Rama “lëshoi këpucën e tij” drejt opozitës duke e quajtur atë si penguese të reformës në drejtësi, gjithnjë referuar sjelljes së saj politike kohët e fundit, kulmuar me këpucën e Monikës.
“Janë rikthyer në çadër me të njëjtat kërcënime dhe me të njëjtin qëllim, mos lejimi i çuarjes përpara të reformës në drejtësi. Dhe seanca e fundit e Kuvendit për vitin e shkuar nxorri në pah me ngjyra të forta dhe kërcitje të mëdha ishte pikërisht shprehja më kulmore e dëshpërimit dhe e mungesës së vizionit, strategjisë dhe ideve përballë faktit se reforma në drejtësi po bëhet çdo ditë më e pandalshme. Ndërkohë që procesi i vetingut ka nisur dhe jam besimplotë se dy-tre muajt e parë të vitit do të ketë rezultate konkrete”, tha Rama nën fjalimin e tij në Asamblenë e PS-së paraditen e kësaj të shtune.
Kreu i mazhorancës nuk ka ngurruar që LSI-në, aleatin e djeshëm, ta cilësojë si një penguese të kësaj reforme.
“Të gjithë jemi dëshmitarë që rrezikuam qeverinë por nuk lejuam të rrezikonim ecurinë e reformës në drejtësi dhe u përpoqëm të mbanim gjallë Aleancën si projekt strategjik por pa kompromentuar reformën në drejtësi. Qëndrimi ynë i qartë dhe i prerë për të mos kompromentuar reformën në drejtësi ndau rrugët tona me aleatin e deri djeshëm të mandatit të parë qeverisës”, tha Rama. /tesheshi.com/
