Tek tematikës klimaterike, fjalimi i kryeministrit Rama në Asamblenë e përgjithshme të OKB-së ka patur dhe një linjë politike, e kjo sa i përket Kosovës.
Duke folur për zhvillimet rajonale, vizionin e së ardhmes së vendeve të Ballkanit Perëndimor, Rama i kërkoi drejtpëdrejt e publikisht Serbisë që ta njohë Kosovën, edhe duke e mikluar me fjalët e koketuara “e dashur Serbi”.
“Ka ardhur koha që të gjithë vendet e kësaj Asambleje, sidomos e së pari miqtë tanë serbë të njohin pavarësinë e Kosovës për t’i dhënë hakun historisë e për të njohur realitetin, si e vetmja bazë e fortë për të ndërtuar një të ardhme të përbashkët më të mirë.
E dashur Serbi, Kosova e pavarur është një realitet i pakthyeshëm, kështu që mos jetoni më në mohim dhe bëni historinë për veten tuaj dhe për botën, duke ardhur në realitet.
Është po kështu e rëndësishme që Kosovës t’i jepet mundësia që të bëhet pjesë e të gjitha organizatave rajonale ndërkombëtare, ku çdo vend sovran e i pavarur i botës ka të drejtë të bëhet pjesë.
Është shpresa ime e sinqertë dhe angazhimi im i përditshëm që Ballkani Perëndimor do të arrijë të shkëputet nga e kaluara njëherë e përgjithnjë e do të punojë sëbashku që të ndërtojë ekonomitë e vendeve të tyre, të integrojë tregjet e të ofrojë një të ardhme shumë më të mirë, duke menduar dhe duke punuar për fëmijët e tyre dhe duke mos folur më për hijet e të shkuarës”, tha Rama.
Më tej, kryeministri shqiptar bëri dhe rolin e atij të Kosovës, në një sens avokature, teksa kërkoi që Kosovës t’i liberalizohen vizat.
“Në këtë drejtim do të doja që të theksoja një fakt, të cilin e kam përmendur në mënyrë të përsëritur me kolegët e mi europianë, është e pajustifikueshme që Kosova, një vend me vetëm 2 milionë banorë, mbetet edhe sot që flasim vendi i vetëm europian, populli i të cilit është i izoluar nga i gjithë rrjeti i regjimit të liberalizimit të vizave.
Dëgjoni këtë: Nga viti 2014, më shumë se 100 milionë njerëz i janë shtuar asaj bashkësie njerëzisht që mund të hyjnë në BE pa viza.
Si është e mundur që BE ende të mbajë peng vetëm 2 milionë njerëz që kanë luftuar kaq fort për të fituar lirinë e tyre dhe që mbeten të angazhuar në mënyrë kaq të palëkundur ndaj perspektivës së tyre për në BE?!
E dashur BE, ndaloje këtë gjë të pakuptimtë”, tha Rama.
Referuar këtij pozicioni e këtij qëndrimi, kujtojmë që afro një vit më parë, një pjesë e elitës kosovare, ku veçoi dhe vetë kryeminsitri Haradinaj, i kërkuan që të mos ndërhyjë në punët e Kosovës. Thënë ndryshe, të mos bënte protagonistin në raport me Beogradin, sipas gjykimit të tyre, më tepër se ç’i takonte. /tesheshi.com/
