Kryeministri Rama citoi sërish Profetin Muhamed teksa në një konferencë për media me presidentin Erdogan përcolli sërish falenderime ndaj këtij të fundit.
Referuar përurimit të 500 banesave në Laç, ndërtuar nga Turqia për të pastrehët e tërmetit, Rama tha:
“Ditë e rëndësishme dhe e bukur për ne. Ata tashmë kanë kushte më të mira se sa para se tërmeti t’i linte pa shtëpi.
Dua ta falënderoj presidentin që u gjend pranë nesh qysh në sekondën e parë pas goditjes së tërmetit me një angazhim shumë konkret, e mbajti fjalën, por kjo nuk është lajm kur bëhet fjalë për presidentin Erdogan, sepse ai diçka kur e thonë e bën.
Mbase ndokush mund të mendojë se po e teproj me falënderime, por siç thotë (hadith- thënie) profeti Muhamed, ‘Kush nuk i falënderon njerëzit nuk e ka falënderuar Zotin’”, tha Rama.
Ndër disa marrëveshje të nënshkruara, ishte dhe ajo për futjen e shqipes si lëndë më zgjedhje në arsimin turk.
“Lajmi i mirë është se ashtu sikundër u diskutua është realitet futja e gjuhës shqipe si gjuhë me përzgjedhje në arsimin turk.
Monitorimi i rrugëve të Shqipërisë me kamera inteligjente falë asistencës së qeverisë turke.
Po merr formë projekti i parkut të parë teknologjik falë mbështetjes së presidentit.
Po punojmë të rrisim kapacitete e inteligjencës në fushën e të ardhurave tatimore dhe doganore për të rritur volumin tregtar.
Nuk jemi xhelozë për fqinjët por se si na vjen që janë miliona turistë turq shkojnë në vende të tjera. Niveli i vizitorëve turq në Shqipëri nuk është në përputhje me dashurinë mes këtyre dy popujve, do të nisim ta ndryshojmë këtë trend”, tha Rama.
Marrëveshjet e nënshkruara:
1- Marrëveshje bashkëpunimi ndërmjet Agjencisë Anadolu dhe Agjencisë Telegrafike Shqiptare.
2- Memorandum mirëkuptimi për bashkëpunimin në fushën e trajnimeve për zbatimin e ligjit ndërmjet qeverisë së Turqisë dhe Shqipërisë.
3- Protokoll Bashkëpunimi ndërmjet Drejtorisë së Arkivit Shtetërore Turqisë dhe Drejtorisë së Përgjithshme të Arkivit.
4- Memorandum mirëkuptimi për Bashkëpunimin në Fushën e Rinisë dhe Sporteve ndërmjet ministrisë se Turqisë dhe asaj shqiptare.
5- Memorandum mirëkuptimi ndërmjet ministrisë së jashtme të Turqisë dhe asaj shqiptare për bashkëpunimin në fushën e protokollit.
6- Protokoll bashkëpunimi ndërmjet Drejtorisë së Përgjithshme Shtetërore të Operas së Baletit dhe të ministrisë së Kulturës dhe Turizmit të Turqisë dhe Ansamblit të Operas dhe Baletit dhe Folklorit shqiptar.
7- Memorandum mirëkuptimi në fushën e menaxhimit të Fatkeqësive ndërmjet Drejtorisë së Emergjencave dhe Ministrisë së Brendshme të Turqisë. /tesheshi.com/
