Krerët e Ballkanit Perëndimor patën një darkë pune në Bruksel me shefen e Politikës së Jashtme në ikje Federica Mogherini, ku mungoi kryeministri Rama, ende pa u thënë arsyeja se pse.
Shefi i qeverisë shqiptare pati një ditë të ethshme në Athinë, ku u takua e bisedoi me homologun Mitsotakis, e në mbrëmje duhej te gjendej në tryezë me gruan e diplomacisë së BE në Bruksel. Por kjo nuk ndodhi. Me Mogherinin qenë të tjerët, prej ku dhanë mesazhe për një darkë të frytshme lamtumire.
“Darka ishte menduar si një lamtumirë. Falë një përzierjeje të rrethanave të ndryshme në lidhje me rajonin tonë dhe perspektivën e tij, darka ishte me të vërtetë një e tillë pune”, tha presidenti malazez Milo Gjukanoviç.
Gjukanoviç tha se mesazhi i Mogherini ishte se ajo priste vazhdimësinë e politikës së zgjerimit për sa kohë që vendet e Ballkanit Perëndimor ishin të vendosur për të miratuar një sistem me vlera evropiane dhe të përpiqeshin për një cilësi evropiane të jetës. /tesheshi.com/
