Referuar rasteve më të fundit të akteve të dhunës ndaj bluzave të bardha, çka detyroi dhe këto të fundit të protestonin, kryeministri Rama ka dalë në mbrojtje të tyre, duke paralajmëruar dhe ashpërsimin e Kodit Penal për çdokënd që prek një mjek a infermier.
“Janë të paktën katër raste të agresionit të verbër ndaj mjekëve në krye të detyrës dhe llogariten rreth 315 mijë raste të trajtuara vetëm në urgjencat e QSUT, që trajtohen në kohë dhe me përgjegjshmëri nga mjekët, pavarësisht vështirësive me të cilat përballen.
Mjekët nuk janë djaj!
Mirëpresim çdo protestë të kësaj natyre si një ndihmë e madhe në sensibilizimin e opinionit në lidhje me faktin që mjekët nuk janë figura e djallit që përgojohet çdo ditë, sidomos në rrjetet sociale, që na sjellin prurjet e injorancës, agresivitetit dhe të boshllëkut të madh. Nëse do të thoshim se në sistemin shëndetësor nuk ka korrupsion do të thonim një gënjeshtër të madhe.
Përcaktimi i kufijve të spitalve është domosdoshmëri, nuk mund të vijojnë t’u ngjajnë stacioneve te filmave Far West, ku nuk ka orë të caktuar për ata që shërbejnë dhe shërbehen. Mjekët nuk vrasin, por shpëtojnë jetë.
Emocionet e një familjari të marra dhe të kthyera në televizive nga nevoja për audiencë të kthehen në arsye për të pushkatuar të gjithë mjekët, për një që nuk ia ka dalë me sukses një operacioni të caktuar. Paketë e posaçme ligjore që vendos në mbrojtje bluzat e bardha dhe për t’u dhënë mësime shembullore të atyre që u prekin një fije floku të atyre që shërbejnë“, premtoi Rama.
Sipas shefit të qeverisë, dhuna ndaj bluzave të bardha ka dhe frymëzues nga politika e media.
“Kush nuk sheh dallimin me të kaluarën ka nevojë realisht për shërbim okulistik dhe nëse te okulisti del që është në rregull ka nevojë për psikolog, që ta ndihmojë që të dalë nga negativiteti.
Goditen mjekë, policë, punonjës të shtetit, përfaqësues të popullit për shkak të detyrës, por kjo nuk mund të kthehet në sport. Është e nevojshme për të ndërhyrë në Kodin Penal, po diskutojmë brenda grupit parlamentar dhe ministrisë së Drejtësisë. Rikonsiderimi i kanosjes ndaj bluzave të bardha është një domosdshmëri.
Ju pëlqen atyre që marrin kamerat dhe i fusin ende në vrima të zeza të sistemit dhe të thonë se nuk e njohim realitetin, ndërkohë që ne me këtë merremi çdo ditë, si nuk e njohim?!
Këta i fryjnë zjarreve të urrejtjes për mjekët duke i futur të gjithë në një thes. Kjo është barbari që frymëzohet në një moment ku dhuna duket si i vetmi opsion demokratik, duke u predikuar nga lloj-lloj kadrinjsh“, deklaroi Rama. /tesheshi.com/
