Shefi i qeverisë shqiptare ka shfrytëzuar kongresin e PBDNJ-së, për të sheshuar mosmarrveshjet me kreun e kësaj force, Vangjel Dule, i cili pothujse ka kaluar në opozitë krah Bashës.
“Motra dhe vëllezër minoritarë, i dashur Vangjel, i dashur dhe i paharruar Solis. Pavarësisht momenteve të caktuara, konjukturave që na kanë parë herë më afër herë më larg, në fakt ne kemi qenë përherë pranë. Historikisht për PS minoriteti ka qenë i afërt. PS ka të drejtë të krenohet për të gjithë solidaritetin që ka treguar në 25 vjet me popullin e minoritetit. Ka gjëra që duhen bërë më mirë, sfida, probleme, por e vërteta është që një fill i gjatë i pandërprerë miqësie e lidh PS me minoritetin. Kjo nuk është ndikuar nga pozicionet e ndryshme që ka zgjedhur në vite PBDNJ-ja. Më lidh një miqësi personale me kreun e PBDNJ-së, nuk kemi distancë diplomatike dhe kjo është një gjë e mirë”, tha Rama.
Nuk dihet se sa efekt do të kenë fjalët mikluese të Ramës ditët në vijim, por fakt ështe se PBDNJ dhe Vangjel Dule, u çfaktorizuan për herë ta parë në çerekshekulli politikë, pikërisht pas ardhjes së Ramës në pushtet, e reflektuar kjo dhe në acarimet e shumta të Athinës politike dhe fetare me politikat e kreut të qeverisë shqiptare. /tesheshi.com/
