Një ditë pas miratimit në parlament të ligjit të vettingu-t, aleatët e ftohur mes tyre, Rama e Meta, kanë drekuar së bashku në një restorant në qendër të Tiranës.
“Diskutuam për ndeshjen Shqipëri-Marok dhe për stadiumin e ri të Shkodrës, që do të përurohet sot pasdite”, u tha Meta gazetarëve me një ironi lehtë të kuptueshme, pa preferuar të japë hollësi të tjera me interes politik.
Ky ishte takimi i parë mes dy aleatëve, që pas ndërprerjes së ritit të takimeve çdo të mërkurë tek zyra e Metës në Kuvend, që shënoi dhe një klimë të acartë mes tyre deri në vënien në diskutim të vijimit të qeverisjes në koalicion. Dhe e gjitha, për shkak të reformës në drejtësi.
Ndërkohë, Rama paralajmëroi dje në një ballafaqim publik në rrjetet sociale, se ka një ngërç mes tij dhe Metës, për të cilin duhet një ridiskutim. Por dje në seancën e vettingu-t, Meta habiti me qëndrimin e tij kundër ankesave në formë amendamentesh të opozitës, duke e dhënë votën “pro” pa u lodhur shumë për konsensus me të. /tesheshi.com/
