Kryeministri Edi Rama ka pritur sot në mëngjes në zyrë kreun e Kuvendit Ilir Meta. Ky takim nuk është rutinë apo i rastësishëm, por ka lidhje me funksionimin e koalicionit mes tyre që prej kohësh ka marrë plasaritje.
Takimi vjen një ditë pasi deputetët e Metës në Komisionin Parlamentar të Shëndetësisë rrëzuan koncesionin e ri të ministrisë së Shëndetësisë.
Përveç opozitës, edhe deputetët e LSI-së votuan kundër projektit që ligjëron rritjen e çmimit të barnave për pacientët me 2.4%. Kështu plani i qeverisë për të rritur tarifën e çdo pulle për ilaçet dhe medikamentet e tjera shëndetësore shtyhet përsëri.
“Nuk mund të votoj pro kësaj marrëveshjeje. Ajo duhet të kalojë në rinegocim dhe të vijë një herë tjetër për t’u diskutuar. Nuk mund të pranoj që me votën time të shtohet kosto në dëm të pacientit”, deklaroi deputeti i LSI-së, Vangjel Tavo.
Kësisoj qeveria detyrohet të tërheq këtë propozim dhe ta rishikojë deri në një moment të dytë kur të ketë siguruar votat e aleatit të saj.
Krisja e koalicionit
Ky votim është rasti i fundit i daljes kundër të LSI-së ndaj nismave të ministrave të PS-së. Megjithëse Ilir Meta thotë se koalicioni ka ende potencial për të funksionuar, ai nuk e ka mbështetur aleatin e tij në disa nisma të ndjeshme, si ajo e importit të mbetjeve, etj. Mospërputhje ka dhe me disa nisma të tjera ligjore, si dhe për reformën zgjedhore në proces. Zëra brenda koalicionit prej muajsh flasin për një ndarje të tyre para zgjedhjeve dhe se të dy partitë po i bëjnë llogaritë veç për votat e 18 qershorit 2017./tesheshi.com/
