Ndeshja e së enjtes me Serbinë nuk është vetëm për futbollin, por në radhë të parë duhet të japë një mesazh të qartë të një Shqipërie mikpritëse, dinjitoze e europiane. Kryeministri Edi Rama ka dhënë këtë mesazh për tifozerinë shqiptare dy ditë përpara ndeshjes së madhe për të cilën përgatitjet janë të shumta, që nga masat e forta të sigurisë e deri tek mesazhet e shumta për të ruajtur qetësinë.
Ndeshja mund të ndiqet edhe në parkun e kryeministrisë e ndërsa i ka bërë “reklamë” këtij vendi, Rama në mesazhin e tij bën edhe analizën e ndeshjes.
“Fitorja na çon direkt në Francë 2016. Barazimi është një tjetër hap drejt Europianit. Humbja lë gjithçka të hapur”, shkruan kryeministri.
“Mbi të gjitha, duhet të fitojë imazhi i Shqipërisë mikpritëse, dinjitoze, europiane, në një ndeshje futbolli ku e tërë bota perveç nesh, nuk do të shohë rezultatin e ndeshjes po mbarëvajtjen e takimit të kthimit në Shqipëri, një vit pas shpërthimit të dhunshëm në fushën e Beogradit”, thotë ai, duke ftuar tifozerinë të nderojë “traditën shqiptare dhe ambicjen europiane”. /tesheshi.com/
