Edi Rama, njeriu që besohet se urrehet më shumë se çdokush tjetër nga një segment në pushtet i politikës maqedonase, nuk ka heshtur pas asaj çfarë ndodhi pasditen e së mërkurës, ku presidenti Ivanov refuzoi ta mandatojë kreun e LSDM-së, Zoran Zaev për të formuar qeverinë e re, pikërisht nga pranimi prej këtij të fundit i kushteve shqiptare, paraparë në Platformën e hartuar mes forcave kryesore politike në zyrën e Ramës në Tiranë, fill pas zgjedhjeve të 11 dhjetorit.
Shefi i ekzekutivit shqiptar i ka përcjellë dy gisht mesazh Ivanovit, fiks dy fjali:
“Zoti Ivanov, gjuha shqipe s’është e armikut po e një populli shtetformues në Maqedoni. Pa shqiptarët nuk ka Maqedoni i dashur President!”, shkruan Rama në FB.
Edhe pretendimi i pushtetit maqedonas ka qenë pikërisht ky fakt, që nuk mund të pranohej një platformë e krijuar jashtë kufijve të vendit. Dhe pika që e ka sjellë ndarjen e madhe, është pikërisht dygjuhësia. /tesheshi.com/
