Kryeministri Edi Rama iu është drejtuar sot me një fjalim të pranishmëve në ceremoninë e nisjes së kontrollimit ndërkombëtar të kufijve, FRONTEX. Fjalimi i tij iu drejtuar posaçërisht të pranishmit, Komisionerit të BE-se për Migrim, Dimitris Avramopoulos.
“Dua të ju them se keni ardhur në një vend që sipas anketave tuaja, 93% e njerëzve mbështesin integrimin në BE, një shifër që nuk mund të gjendet në vendet tuaja për arsye të ndryshme. Por kjo nuk është një për të qeshur nga habia, sepse ne nuk jemi naiv në këtë dashuri, dhe nuk jemi të verbër përballë verbërisë ndaj historisë së BE-së.
Ne jemi thjeshtë pjesë e një territori që luftën nuk e ka parë në televizor e në arkiva, por e kemi pasur këtu: 500.000 shqiptarë nga Kosova këtu i ka sjellë lufta, ashtu sikundër në gjithë këtë rajon ka shkaktuar viktima të panumërta, në kohën kur në BE lufta konsiderohej një çështje e zgjidhur e së shkuarës, falë BE-së.”
Rama e përfundoi fjalimin me një mesazh drejtuar ndërkombëtarëve, duke u shprehur se “ka kënqësinë e madhe që kanë ardhur në një vend ku 93% e popullsisë është e dashuruar në Europën, dhe se shpreson që edhe Europa do ta rigjejë dashurinë për vetveten”. /tesheshi.com/
