Kryeministri Rama iu rikthye idesë së tij për dhënien e një statusi të veçantë komunitetit bektashi, një lloj “Vatikani”, për të cilin tha se “nuk do të kërcënojë askënd, nuk do të vërë në diskutim sovranitetin dhe integritetin territorial të Republikës së Shqipërisë, se çfarë nuk dëgjon njeriu… Jo! Shqipëria është shtet unitar, jo federal. Edhe Italia është shtet unitar, por i ka nja tre realitete brenda saj me statuse të tilla”, tha Rama,
Kjo deklaratë e tij u bë në një konferencë jubilare të 95-vjetorit të vendosjes së Kryegjyshatës Botërore të Bektashinjve në vendin tonë.
“Bektashinjtë janë një monument i gjallë kulture që duhet të mbrohet nga shteti dhe populli shqiptar”, këmbënguli ai.
Rama mbrojti edhe një herë idenë e krijimit të shtetit bektashi, duke thënë: “Ky komunitet është në rrugën e shuarjes, kjo po ndodh para syve tanë. Prandaj historia e bektashinjve është në vetvete thirrja imponuese për t’i dhënë selisë së Kryegjyshatës Botërore, përmes një statusi të ngjashëm me atë të Vatikanit, fuqinë e një embleme e cila nuk do të përçajë askënd”.
“Komunitetet e tjera fetare nuk kanë pse të shqetësohen, sepse ky nuk është trajtim i veçantë, por trajtim i merituar i një komuniteti që e ka qendrën botërore në Shqipëri. Të tjerët do ta kishin shpikur edhe nëse nuk do ta kishin, ndërsa ne e kemi dhe jemi gati ta lëmë të vdesë”, argumentoi i pari i qeverisë.
Kështu, ideja e hedhur nga Rama muaj më parë, e shoqëruar me shumë zhurmë si dhe me teori konspirative, nuk ngjan, fjala vjen, me idenë e hedhur për një akademi barinjsh, e cila prej kur u tha e deri më sot nuk duket asgjëkundi në realitet. Pse sillet ky krahasim? Sepse, siç Rama pretendon se po shuhen bektashinjtë, ashtu po shuhen dhe barinjtë. /tesheshi.com/
