Nga Entela Canaj
Kryeministri Rama ndodhet për një vizitë disaditore në Neë York, SHBA, duke marrë pjesë në Samitin e OKB-së, ndërkohë që më datë 2 tetor do të ketë një fjalë përpara Asamblesë së Përgjithshme Kombeve të Bashkuara.
Por në këtë vizitë të tij, krahas delegacionit shqiptar që e shoqëron, ku bën pjesë ministri Bushati dhe këshilltarë të tjerë, Rama është parë të shoqërohet edhe nga bashkëshortja e tij, Linda Rama.
Deri këtu nuk ka asgjë të keqe, por nëse kujtojmë rregulloren e miratuar nga vetë kryeministri Rama rreth dy vite më parë, apo më saktë Kodin e Etikës, kryeministri duket ka bërë një shkelje në këtë rast, pasi në vizita të tilla zyrtare, qeveritarëve nuk u lejohet që të marrin me vete bashkëshortet apo familjarë të tjerë, e konsideruar kjo si një mënyrë abuzimi me shpenzimet dhe dietat e buxhetit të shtetit.
Këtë vendim, Rama e mori pasi sipas tij, më herët nga ish-qeveria Berisha ishte abuzuar shumë në këtë drejtim. Por dy vite më pas, duket se ky rregull është thyer, apo është lënë mënjanë për një herë të vetme, të paktën kur bëhet fjalë për një vizitë në SHBA, apo për një takim me presidentin Obama.
Kodi i etikës i qeverisë Rama
Në Kodin Etik të Qeverisë Rama, në nenet 35 dhe 36 flitet për rregulloren që duhet të zbatojnë qeveritarët, që nga pëdorimi i makinave e deri tek vizitat jashtë vendit. Konkretisht, për shpenzimet e udhëtimit për bashkëshortët/bashkëjetuesit në kod thuhe se: Shpenzimet për bashkëshortin/bashkëjetuesin e një anëtari të Këshillit të Ministrave, kur ata shoqërojnë ministrin për detyrat zyrtare të këtij të fundit, mund të mbulohen nga fondet publike, me kusht që të jetë e qartë se shoqërimi i ministrit nga ai/ajo është në interesin publik. Pëlqimi i Kryeministrit duhet të merret në çdo rast para udhëtimit.
Ndërsa për përdorimin e makinave zyrtare thuhet: “Ndalohet përdorimi i automjeteve zyrtare për qëllime private, përveç rastit kur kjo lidhet me sigurinë personale dhe të familjes së anëtarit të Këshillit të Ministrave. Në këtë rast, kostot e përdorimit të automjetit paguhen nga anëtari i Këshillit të Ministrave. Kur është e mundur, ministrat nxiten që të përdorin transportin publik.”
Përligjja në këtë rast mund të jetë me paragrafin e parë, pra kur prania e Lindës në krah të Ramës në këtë vizitë të tij konsiderohet si me interes publik. Por në rastin e ministrave që për këtë duhej të merrnin leje nga kryeministri, vetë ky i fundit ku duhet të marrë leje, nëse vendos ta shoqërojë dhe bashkëshortja gjatë një vizite zyrtare?! Logjika të çon drejt faktit se në këtë rast, “ok”-in Rama e ka marrë nga vetja! /tesheshi.com/
