Kryeministri Rama po kërkon që Ballkani Perëndimor të anëtarësohet sa më shpejt në BE dhe për këtë po kërkon mbështetje nga kancelari i ri gjerman Olaf Scholz, shkruan Die Welt, te e cila ai ka dhënë një intervistë.
Kjo ka qenë dhe arsyeja kryesore e vizitës së tij në Berlin pak ditë më parë, ku u takua me Scholz, pra marrja e një mbështetjeje për anëtarësimin sa më të shpejtë të Shqipërisë në BE, si dhe të rajonit.
“Kancelari është treguar i gatshëm për të përshpejtuar këtë proces”, tha Rama. “Scholz është kështu në të njëjtën linjë me ministren e tij të Jashtme Annalene Baerbock si pjesa tjetër e qeverisë së tij socialdemokrate-gjelbër-liberale.
Fokusi i shtuar në Ballkanin Perëndimor është përshpejtuar pas sulmit të Rusisë ndaj Ukrainës dhe frikës për efektet negative që këto ngjarje mund të kenë në këtë rajon ende të paqëndrueshëm”, ka thënë Rama në intervistën e tij, duke ka theksuar pikërisht këtë aspekt të sigurisë, shkruan DW.
“Bashkimi Europian do të ishte më i sigurt dhe më i fortë me vendet e Ballkanit Perëndimor”, këmbëngul i pari i qeverisë shqiptare.
Ai përmendi situatën me refugjatët në vitin 2015, kur qindra mijëra refugjatë nga Lindja e Mesme mbërritën në Bashkimin Evropian nëpërmjet Ballkanit Perëndimor. “Nëse ato vende do të ishin anëtare të BE-së në atë kohë, do të ishte shumë më e lehtë të dobësohej ajo valë refugjatësh”, ka thënë Rama, një teze e re kjo e tij.
Ai gjithashtu pajtohet me vlerësimin se situata në rajon pas sulmit rus ndaj Ukrainës është edhe më e ndjeshme. “Rajoni është i pambrojtur për shkak të ndikimit të fortë rus. Jo në Shqipëri, por për shkak të ndikimit rus në Bosnje, Mal të Zi dhe mbi të gjitha Serbi. Por është një shenjë shumë e mirë që Serbia e dënoi agresionin rus në Asamblenë e Përgjithshme të OKB-së, duke u rreshtuar në anën e Perëndimit”, tha Rama.
Ai mbrojti liderët e Francës dhe Gjermanisë, të cilët janë vënë nën kritika si shumë të butë me presidentin rus Vladimir Putin. “Unë nuk mendoj se Merkel apo Steinmeier ishin shumë të butë me Putinin. Ata nuk ngurruan të dënonin Rusinë kur duhej,” tha Rama.
Nuk ka mungesë falë Serbisë
Rama shpjegoi se aktualisht në Shqipëri nuk ka probleme me rritjen e çmimeve të ushqimeve, të cilat pjesërisht mund t’i atribuohen Serbisë. “Ka një urë të rëndësishme me Serbinë, e cila prej vitesh furnizon me grurë kompanitë shqiptare. Ne kemi krijuar stoqe duke u dhënë garanci importuesve tanë se nuk do të kenë probleme nëse blejnë më shumë se zakonisht.
Çmimet janë të larta, por nuk mund të flasim për shpërthime të tyre”, përfundoi Rama. /tesheshi.com/
