Si rrallë në karrierën e tij politike, kryeministri Rama përcolli një mesazh të fortë për ndërkombëtarët, duke ju kujtuar atyre se parlamenti është sovran, e si i tillë, do votojë me patjetër marrëveshjen e 5 qershorit, por dhe ndërhyrjet në Kushtetutë për hapjen e listave.
“U them miqve ndërkombëtarë që nga përfaqësuesja e SHBA, e cila u vendos në dispozicion me bujari dhe durim, hapi edhe derën e shtëpisë së saj, meqë parlamenti ishte godinë e papranueshme, të BE-së, të Britanisë, të cilët edhe personalisht e lehtësuan komunikimin në episodin e fundit, përsa kohë unë do të jem kryetar i PS-së, ku bëhet dialog shqip me përkthim dhe ambasada të huaja ashtu edhe zotin Wadephul, është personalitet, më shumë mik me Bashën se me mua, por u them se parlamenti i Shqipërisë është sovran dhe do të vendoset sikur mendojnë përfaqësuesit e popullit në këtë sallë dhe do të vendoset në respekt të marrëveshjes së 5 qershorit nga njëra anë dhe në respekt të më shumë se 80 përqind të shqiptarëve nga ana tjetër, që duan të vendosin jo vetëm partinë por edhe deputetin.
Këto të dyja janë një fakt me të cilën të gjithë miqtë dhe partnerët tanë duhet të jetojnë. Nuk do ta pengojë parlamentin që para mbylljes që të votojë një ndryshim historik, që u shërben shqiptarëve” tha Rama.
Kreu i mazhorancës mbrojti dhe njëherë hapjen e listave, duke argumentuar se ato nuk cenojnë koalicionet.
“Ne po ndalojmë koalicionet? Kjo është qarja e fundit e Lulit. Ne nuk do i ndalojmë por do i bëjmë si në Gjermani dhe në çdo vend të Europës dhe do të isha mirënjohës nëse do të më tregonit një shtet demokratik. Mund të futen në një koalicionet, ose të rifuteni nga aty ku dolët nga koalicioni me PD-në, nëse do të të bëjnë pjesë të programit dhe ti do të jesh anëtar i skuadrës që do të përfaqësojnë, por koalicion.
CDU-CSU-ja është një koalicion, por ka një kandidat për kancelar dhe një skuadër dhe i shpërndajnë në fushën e betejës jo si ne në Tiranë që kemi 3 mijë kandidatë”, argumentoi shefi i qeverisë. /tesheshi.com/
