Kryeministri Rama mblodhi krerët e Bashkive – ku nuk ju përgjigjën vetëm ata të opozitës – për t’ju shpalosur dhe njëherë vizionin e tij zhvillimor me anë të agroturizmit, tashmë që po afron dhe fundi i sezonit.
“Ju lutem që të fokusoheni te agro-turizmi sepse është e papranueshme që ndërkohë që potenciali i agro-turizmit është kaq i madh, ne të mos kemi aplikues për grante. Ne nuk kishim aplikime sa duhet nga bashkitë, ndërkohë që duhet të mos kishim grante sa duhej për aplikuesit e shumtë. Duhet bërë më shumë në këtë aspekt”, theksoi Rama.
Sipas shefit të qeverisë, janë treguesit e turizmit ato që e nxisin drejt industrisë agro.
“Kemi fokusuar përpjekjet tona te turizmi dhe ka patur rritje të numrit të turistëve. Impakti në ekonominë vendore ka qenë i rëndësishëm, ka pasur hapje biznesesh të reja. Në disa zona turistike, shifrat janë domethënëse: 22% më shumë punësime në Sarandë, deri 7% në Vlorë dhe Lezhë”, shtoi Rama. /tesheshi.com/
