Kryeministri Rama mbrojti sistemin elektoral aktual, ku si tregues pozitiv veçoi pjesëmarrjen e grave në parlament. E këtë e bëri duke e marrë fjalën pas deputetes Hajdari, e cila kërkoi ndryshimin e sistemit, duke iu referuar qasjes që duhet të ketë ajo, apo ata (opozita e re), në komisionin e reformës zgjedhore.
“Debati për sistemin, është debat që s’ka fund, dhe s’ka për të pasur fund jo vetëm në Shqipëri po askund. Me sistemin që kemi zgjedhur, pavarësisht se si është dëshiruar të interpretohet dhe të komentohet lartë e poshtë nga të interesuarit për të justifikuar humbjet e tyre, apo axhendat e tyre mediatike, kemi sot një parlament që s’do ta kishim kurrë me sistemin e kaluar. Mjafton të shikojmë numrin e grave në parlament.
Me gjithë respektin për sa tha parafolësja, ose përsa mund të thuhet me të drejtë, për disa avantazhe të një sistemi që kalon drejtpërdrejt nga zgjedhja mazhoritare, ishte vetëm 10 vjet – 15 vjet më parë, kur parlamenti kishte 2-3 gra.
Është fakt që me këtë sistem ne kemi krijuar kushte, për të pasur një zgjedhje shumë më përfaqësuese të shoqërisë, dhe jo thjesht për t’u lidhur pas individësh që mund të realizojnë marrjen e mandatit në një zona a tjetër, por që nuk garantojnë të paktën në këtë fazë zhvillimi të vendit tonë, një përfaqësim të larmishëm, dhe shumë më pranë ngjyrave të vetë shoqërisë. Ky është fakt, dhe mund ta dëshmojnë të gjitha zonjat në parlament.
Parlamenti është vendosur në shënjestër, është përqeshur, e kështu me radhë, për një mijë e një arsye, sikundër treguan edhe faktet, se e gjithë ajo baltë në pjesën e saj më të madhe, ishte propagandë.
Unë do t’i lutesha të mbajnë parasysh dinamikën e zhvillimit, shoqërinë ku jetojmë, nga vijnë, dhe të kemi gjithmonë në sy horizontin ku duam të shkojmë”, tha Rama. /tesheshi.com/
