Edi Rama ka mbledhur sërish në selinë rozë shtabin zgjedhor të Partisë Socialiste, megjithëse sot ka qenë një ditë shumë e ngjeshur për të, me disa aktivitete. Në sallën e mbledhjeve ka bërë bashkë të ashtuquajturin “grup organizativ të zgjedhjeve të vitit 2017”. Në këtë grup bëjnë pjesë kreu i Asamblesë Kombëtare, Gramoz Ruçi, zëvendëskryeministri Niko Peleshi, nënkryetari i grupit parlamentar, Taulant Balla, dhe kryetarët e bashkive të Tiranës, Durrësit dhe Vlorës.
Takimi është zhvilluar me dyer të mbyllura, por, siç mësohet, Rama ka kërkuar që strukturat e PS-së të jenë në gatishmëri për çdo rast, nëse mund të ngjasë që të shkohet në zgjedhje të reja. Ngutja e PS-së edhe në vulgun e problemeve me LSI-në i shton edhe më shumë spekulimet për një version alla Syriza të Ramës, që mund ta çojë vendin në zgjedhje të parakohshme.
Burime brenda PS-së bënë të ditur se bëhet fjalë për krijimin e një strukture kombëtare që do t’i menaxhojë zgjedhjet në çdo qelizë të vendit. Kjo strukturë do të jetë vertikale, dhe së shpejti do të bëhet gati një “armatë e tërë” zgjedhore socialiste me militantë, që pritet edhe të punësohen rishtas për të mbushur boshllëkun e krijuar prej pakënaqësive.
Duhet kujtuar se Partia Socialiste do të mbajë në dhjetor kongresin e ri zgjedhor, prej nga do të dalin strukturat e rifreskuara të Asamblesë Kombëtare dhe të kryesisë.
Por për çfarë zgjedhjesh përgatitet PS-ja, në një kohë që ende nuk janë sqaruar problemet me aleatët dhe nga LSI-ja ka presione për ndryshime në qeveri?! /tesheshi.com/
