Papunësia, korrupsioni dhe cinizmi i vetë socialistëve janë vlerësuar nga kryeministri Edi Rama si tre rreziqet që i kanosen mandatit të dytë qeverisës. Rama ka mbledhur ministrat dhe zv.ministrat për objektivat e 100 ditëve të para, një ditë pas mbledhjes së Asamblesë së Partisë Socialiste. Rama i ka drejtuar një apel anëtarëve të qeverisë, por edhe më gjerë, që të vlerësojnë me kujdes situatat, pasi edhe pse opozita mund të duket e dobët nuk duhet nënvlerësuar më shumë seç duhet.
Ai ka zgjedhur t´i tregojë anëtarëve të qeverisë edhe një histori, në formën e një përralle, por duke përçuar mesazhin se duhet vepruar në grup duke përqëndruar forcat.
“Na ishte njëherë skuadra ‘Galaktike’ por nuk fituan asnjë trofe, pasi nuk ishin një grup. Kundërshtarët tanë nuk janë të dobët, por të egër dhe të rrezikshëm, 3 rreziqe na kanosen: papunësia, korrupsioni dhe cinizmi. Kemi edhe një opozitë të dobët që ulëret dhe shan si frikacaku kur kalon pyllin natën, por ky është një rrezik në vete. Kemi vetëm dy aleatë, popullin dhe dëshirën tonë”, tha Rama.
Më vijim ai hodhi dritë mbi objektivat që çdo ministri duhet të ketë në 100 ditët e para. Në këtë kuadër ai përmendi përpjekjet për të marrë vitin e ardhshëm statusin e vendit kandidat për në BE, luftën dhe shkatërrimin e plotë të kanabisit, vetingun në polici.
“Duhet të punojmë të gjithë që të celim negociatat vitin e ardhshëm, por që të jemi gati për negociatat, që janë një proçes tejet i ndërlikuar. Ministria për Europën do e udhëheqë këtë proces. Duhet të filojmë betejën me krimin dhe të realizojmë vetingun në radhët e policisë. Do të vijojë lufta kundër informalitetit”, tha Rama. /tesheshi.com/
