Kryeministri Rama mblodhi në një takim ata që me gjuhë popullore mund quhen zengjinët e Shqipërisë, me gjuhë politike oligarkë, e me gjuhë korrekte, të pasurit e vendit, duke i kërkuar që të kontribuojnë me një përqindje mujore nga xhepat e tyre, për të ndihmuar halleshumtët ndër bashkëqytetarë me tjetër fat nga ata.
“Secilit prej jush t’i bjerë një barrë e barabartë, e cila mund të jetë 2% mbi dividentin, jo të kompanisë, por dividentit tuaj. Mekanizimi nuk do të kontrollohet nga qeveria, por nga ju. Qeveria do të sjellë pranë jush nevojat dhe bashkë me ju, si pjesëtare e një bordi që duhet diskutuar se si do të zgjidhet nga ju dhe si do të bëjë të gjithë procesin, të përcaktojë se cilat janë ato halle dhe ato nevoja të menjëhershme që duhen kthyer në projekt dhe duhen realizuar në terrenin e jetës së përditshme”, sqaroi Rama, në atë që e quajti krijimin e një fondi të “Shqipërisë solidare”.
“Idenë e krijimit të një fondi të “Shqipërisë solidare” për të adresuar bashkë me ju nevoja dhe halle në drejtim të atyre që janë më në nevojë dhe më në hall. Ideja bazë e këtij fondi nuk është një taksë plus që shkon në buxhetin e shtetit, por një mekanizëm i strukturuar bashkëpunimi midis qeverisë dhe biznesit të madh, apo më saktë midis qeverisë dhe sipërmarrësve të mëdhenj”, tha shefi i qeverisë.
Sipas tij, ky kontribut do jetë dhe në të mirë të tyre në një drejtim të caktuar.
“Ndjesia ndaj biznesit të madh dhe atyre që bëjnë më shumë dhe fitojnë më shumë rrezikon të kthehet në një egërsi shoqërore”, u tha Rama. /tesheshi.com/
