Edi Rama ka mbledhur urgjent kryesinë e PS-së dhe i ka bërë thirrje që partia të bëhet gati hipotetikisht për zgjedhje pa LSI-në; dhe se për këtë arsye duhet mbushur boshllëku në bazë.
“Duhet të dalim urgjentisht në çdo bashki dhe pas një muaji të më sillni situatën reale zonë për zonë. Duhet të përgatitemi që gjithçka mund të ndodhë”, mësohet se ka thënë Rama.
Ndërkaq, kreu i PS-së u ka bërë të ditur anëtarëve të kryesisë se nëse LSI largohet nga koalicioni, atëherë të gjithë vendet e punës që i takojnë LSI-së do t’i marrë PDIU-ja, e cila është bërë gati që ta zëvendësijë partinë e Ilir Metës. Madje në disa qytete si Elbasani për shembull, Idrizi ka marrë kryetarët e LSI-së në partinë e vet.
Rama ka thënë gjithashtu se nëse LSI del vetëm atëherë PS me aleatët e saj i marrin 71 deputetët. Kjo ka qenë edhe një përgjigje ndaj Ilir Metës, i cili ironozoi pikërisht numrin 71 në një konference të sotme për shtyp.
Por Rama ka kërkuar LSI-në në koalicion pasi duhet një mazhorancë për reformat e mëdha, jo thjesht një mazhorancë numrash, dhe “reformat e jo numrat janë arsyet e koalicionit me Metën”, ka thënë Rama në kryesi.
Nga ana tjetër, dy eksponentë të lartë të PS-së, Erion Veliaj dhe Niko Peleshi i janë përgjigjur flakë për flakë Manjanit dhe LSI-së në lidhje me akuzat e shumta. Sipas Veliajt, nëse je në një skuadër nuk ka akuza. /tesheshi.com/
