Kryeministri dhe kryetari i partisë Socialiste, Edi Rama mblodhi koordinatorët socialistë në qarqe në një takim ku u diskutua intensifikimi i fushatës së pritshme zgjedhore. Ndërsa një ditë më parë u fol vetëm për largimin e ministrit të Brendshëm, Saimir Tahiri, mësohet se Rama ka komunikuar zëvendësimin edhe të tre ministrave të tjerë.
Kështu, burime nga takimi flasin se bashkë me Tahirin do të lënë qeverinë këtë fund mandati, edhe ministrat Çuçi, Klosi, dhe Beqaj.
Burimet thonë se ministrat do të përkushtohen me kohë të plotë në fushatën e zgjedhjeve të 18 qershorit. Emrat e atyre që do i zëvendësojnë pritet të publikohen ditën e hënë.
Në mbledhjen që zgjati më shumë se 40 minuta ishin të pranishëm ministrat Çuçi, Beqaj, Nikolla, Klosi, Kodheli dhe Tahiri.
Po kështu në mbledhje ishte dhe kryetari i grupit parlamentar Gramoz Ruçi, ndërsa mungonte ministri Gjiknuri. /tesheshi.com/
