Opozita ka gabuar me sjelljen kundrejt Gramoz Ruçit, i cili nesër do të zgjidhet në postin e Kryetarit të Kuvendit.
Deklarata është bërë nga kryeministri Edi Rama në takimin e parë me grupin e ri parlamentar socialist, i mbledhur në selinë e kësaj partie. Rama tha se javën e ardhshme do të votohet qeveria, duke konfirmuar nëkëtë mënyrë që në seancën e së shtunës do të votohet vetëm për zgjedhjen e strukturave drejtuese të Kuvendit.
“Jam i bindur se në atë sallë do të nisë një kapitull i ri i jetës parlamentare me zgjedhjen e Gramozit në krye të Kuvendit. Dua të nënvizoj qartë për ata që na dëgjojnë se Gramozi nuk është njeriu i duhur, për të investuar besimin tonë sepse është shoku ynë, por është shoku ynë sepse është njeriu i duhur për të investuar besimin tonë.
U them konkurrentëve tanë demokratë se nëse nuk e votojnë Gramozin nëser, gabojnë një herë, por duke e shenjestruar me topat e politikës së baltës gabojnë 100 herë se refuzojnë deputetin me historinë më të gjatë parlamentare, sepse refuzojnë të kuptojnë se Shqipërisë as nuk i duhen e se shqiptarët i refuzojnë sepse duan punën dhe mirëqënien e tyre”, theksoi Rama.
Gjithashtu kreu i socialisteve i kujtoi deputetëve dhe ministrave se është bërë gati dhe marrëveshja e mirëkuptimit mes qeverisë, grupit parlamentar të PS dhe vetë partisë, e cila pret të nënshkruhet.
Në marrëveshje parashikohet se në rast se ministrat nuk do të raportojnë përpara grupit parlamentar brenda një hakur kohor 3 muajor, atëherën ata do të shkarkohen menjëherë.
“Fillim javën e ardhshme do të paraqesim në Kuvend qeverinë e re, programin e saj dhe më pas do të paraqesim dhe kryetarët e komisioneve parlamentare.
Kemi hartuar tekstin e marrëveshjes së mirëkuptimit, mes qeverisë, grupit parlamentar dhe partisë, e cila do të nënshkruhet në prani të të gjithë anëtarëve të PS.
Natyrisht që, puna e grupit fillon zyrtarisht nesër me seancën e parë të Kuvendit, por do të vazhdojë intensivisht jo vetëm në Parlament, por edhe në terrenin ku skuadra e deputetëtëve do të jenë të pranishëm siç kemi folur edhe më parë, për të vijuar komunikimin dhe ndërveprimin me zgjedhësit”, theksoi Rama. /tesheshi.com/
