Një përplasje e paprecedentë Rama – Lu ka ndodhur në distancë, ku strumbullari është ministri Xhafaj, më saktë vëllai i tij.
Ambasadori amerikan nuk e ka pranuar deklaratën e kryeministrit në parlament se SHBA e ka parë rastin e vëllait të Fatmir Xhafajt.
“Ne po i shqyrtojmë akuzat e PD-së për vëllain e Fatmir Xhafajt. Kryeministri Edi Rama nuk duhet të fliste në emër të SHBA-së. Ai flet në emër të tij dhe SHBA flet vetë”, ka deklaruar Donald Lu para gazetarëve, që përbën një qëndrim shumë të fortë të Uashingtonit.
Edi Rama deklaroi dje në Parlament tekstualisht: “Nëse në këtë zurna do të kishte një grimcë përgjegjësi të ministrit tonë të Brendshëm, përpara se të flisnin këta, do fliste miku ynë protagonist i jetës sonë publike, ambasadori amerikan dhe i BE. Do flisnin ata që nuk kanë lënë rast pa folur, pasi nuk kanë lënë rast pa verifikuar.
Ata as kanë folur dhe as kanë çfarë të thonë fare. Për ata ky është një fakt i njohur dhe nuk përbën asnjë implikim direkt ose indirekt qoftë të qeverisë së këtyre, qoftë tonën”, tha Rama.
Por ndërkohë, ky i fundit nuk ia ka përtuar t’ja kthejë Lu-së për kritikat në adresë të tij.
“Patjetër që unë flas për veten time dhe miku ynë Lu flet për veten e vet. Dhe krejt normalisht, është puna ime të them atë që mendoj kur flas lidhur me të, siç është puna e tij të thotë atë që mendon kur pyetet lidhur mua”, është shprehur Rama në FB. /tesheshi.com/
