Sekretari i Përgjithshëm i LSI-së, Luan Rama ka mbrojtur kolegun e tij partiak të shkarkuar nga posti i ministrit të Drejtësisë, Ylli Manjani, lidhur me pohimet e tij mbi kanabisin. “Manjani ka konfirmuar atë që raporton çdo ditë policia”, tha Rama.
Më pas ky i fundit ka bërë një krahasim mes operacionit të ndalimit të trafikut të skafeve 14 vjet më parë kur ishte ministër i Rendit nën qeverinë Nano dhe atij të Lazaratit 3 vjet më parë nga qeveria Rama. “Ai trafik u zhduk 100 për qind, ndërsa pas Lazaratit kanabisi u përhap në të gjithë Shqipërinë”, tha lësëisti Rama.
Sipas tij, pohimet e Manjanit kanë qenë shprehje e përgjegjshmërisë së tij si qytetar e qeveritar, dhe jo domosdoshmërisht duhen parë si kundër qeverisë.
Qeveria ka dështuar në luftën kundër drogës – ka konkluduar Luan Rama, eksponent nga kampi aleat. Qëndrimet e tij u shprehën gjatë pranisë në një debat në Top Story. /tesheshi.com/
