Eshtë bërë publike një letër që kreu i mazhorancës Edi Rama u ka dërguar të zgjedhurve të rinj të 30 Qershorit, e cila zbulon dhe vizionin politik të tij për të ardhmen e afërt.
“Mos e harroni: PS fitoi per ju në 30 qershor. ju duhet te bëni gjithçka që PS të fitojë për Shqipërinë në qershor 2021!“, Rama në fundin e saj.
Por si e nis atë, cilat janë urdhërat dhe këshillat?
“Në mbledhjen e KD (Komiteti Drejtues) në fund të gushtit, duhet të sillni propozimet për stafin politik, dmth nënkryetarët dhe administratorët (minimumi dy propozime). Një nënkryetar duhet të jetë medoemos grua dhe kjo vlen edhe për bashkitë e majta – kush s’e ka do ta gjejë e ta vendose!
Profili i administratoreve duhet të jetë profil sherbetori i komunitetit, jo profile të fortësh, injorantësh, batakçinjsh, feudalesh partiake! Zgjedhja e tyre duhet të mirëpritet jo thjesht nga partia e zonës, po nga komuniteti i zonës dhe më mirë të mërzitet partia se sa komuniteti! Mbajeni parasysh që nuk kam për të pranuar kandidatura nga ato tipiket që dredhin zinxhir se medemek marrin vota! Mos kemi llafe për këtë ju lutem”, shkruan shefi i qeverisë.
Ai më pas ka dhe një porosi për kontigjentin e zyrtarëve të djathtë nëpër bashkitë e marra prej tyre.
“Po ashtu një raport për drejtorët aktuale në bashkitë e djathta, formimi profesional, niveli i militantizmit, lidhjet nepotike dhe niveli i punës së tyre konkrete në bashki. Po ashtu, një listë propozimesh (minimumi dy për një vend) për zëvendësues eventualë, mundësisht të konsultuar paraprakisht me deputetët, asnjë lëvizje deri atë ditë!”,shkruan Rama.
Referuar kësaj të fundit, ai përçoi mesazhin gjatë fushatës se nuk do prekej asnjë zyrtar i djathtë nëse do e meritonte vendin e punës. /tesheshi.com/
