Në një takim me fermerë në Librazhd, kryeministri Rama u tha atyre se para se të mbjellin duhet të dijnë se ç’po mbjellim, që më pas mos iu mbetet prodhimi pa shitur.
“…jemi pre e paditurisë me prodhime që na ngelen nëpër shtëpia që kalben dhe hidhen në lumë. Në bujqësi, historia e zhvillimeve në BE dhe kudo ku ka suksese, tregon se është dija e para, të dish, të jesh i informuar se çfarë kërkon tregu, çfarë është më e mira që mund të bëhet në këtë zonë dhe pastaj të jesh i bashkuar në shitje në mënyrë që të ofrosh sasi të madhe dhe të kontrollosh t’i çmimin, jo të vijnë të ta vendosin të tjerët çmimin edhe të të kapin në hall se mund të të mbetet malli”, theksoi shefi i qeverisë, i cili u kërkoi që të bashkohen për të mirën e tyre.
“Sot suksesi është rezultat i bashkimit. Kudo ku ka sukses sot në fshat, suksesi nuk është personal, individual. Kjo nuk do të thotë hajde të bashkojmë tokat, por të bashkojmë mendjen dhe forcat secili në tokën e vet, secili në ato dynym apo ato hektarë që ka. Por ama me një ndërveprim dhe një vendimmarrje, çfarë do prodhojmë dhe do e shesim së bashku. Nëse jemi të ndarë, dy dynym këtu e tre atje, jemi pre e grosisteve që vijnë dhe o na e marrin për 5 lekë ose nuk na i marrin fare”, shtoi kryeministri. /tesheshi.com/
