Kryeministri Rama i vuri një afat 100 ditësh Drejtorit të ri të Policisë së Shtetit, Muhamet Rrumullaku, për të vënë në shina rendin e cenuar keqaz kohët e fundit nga krimi.
“Brenda 100 ditëve policia e shtetit duhet të dalë nga ky udhëkryq kur ndodhet. Ashtu si e ka pasur edhe drejtori i mëparshëm, mbështetjen e plotë politike e keni. Telefonatave ju keni për detyrë t’i përgjigjeni për kërkesa në telefon nuk keni detyrë t’i përgjigjeni. Nga cilido qoftë. Ditën që unë do ju marr në telefon për të ndërhyrë, atëherë keni të drejtë që ta bëni por kjo nuk do të ndodhë”, tha Rama.
Mbi të gjitha, ai kërkoi që sagës “Ervis Martinaj” t’i jepej fund njëherë e mirë.
“Është e papranueshme që me javë të tëra mëngjeset dhe darkat e shqiptarëve, ekran me ekran dhe faqe me faqe janë bërë si Big Brother i kronikës së zezë, jo u vra jo nuk u vra ai që ishte i shumëkërkuar nga drejtësia dhe çfarë nuk dëgjojnë njerëzit lloj lloj legjendash me luanë me bamirësa, me oligarkë, shto ujë e shto miell si një serial absurd për një nga figurat më të zeza të botës së krimit shqiptar.
Dhe Policia e Shtetit nuk do ta thotë ore u vra apo nuk u vra. Kush e ka penguar ta thotë. Drejtori i ri i policisë së shtetit që merr sot detyrën duhet të sigurohet që kjo dilemë të marrë fund sa më parë, nëse i kërkuari është vrarë ti thuhet publikut që është vrarë, nëse nuk është vrarë të kapet dhe ti jepet drejtësisë”, u shpreh Rama me Rrumbullakun në krah. /tesheshi.com/
