Kryeministri Rama ka prodhuar një skenë tipike prej llojit tij, duke iu qasur homologut Kurti në një variant të shkujdesur fëminor. Kreu i qeverisë shqiptare ka luajtur “gjeje se kush jam” me kryeministrin kosovar, të cilin më pas e ka përqafuar përzemërsisht.
Ka ndodhur kjo në Berlin, në Kongresin e Partive Socialiste Europiane.
Takimi mes tyre vjen në kulmin e një debati në Tiranë e Prishtinë, si reaksion ndaj një fjalimi të Ramës në Strasburg, duke kërkuar zhbërjen e raportit të Dick Marty-t mbi akuzat ndaj UÇK-së.
Nga ata zëra kritikë ndaj fjalëmbajtjes së Ramës, është shprehur dhe ideja konspirative sipas së cilës kreu i mazhorancës po tenton të rrëzojë Kurtin nga pushteti.
Edhe pse dy kryeministrat nuk janë në një gjatësi vale në disa çështje, më kryesorja për Open Balkan, në publik kanë përcjellë vëllazëri politike e atdhetare. Siç në këtë rast. /tesheshi.com/
