Në një tjetër komunikim “sy më sy” me publikun, kryeministri Rama solli në kujtesë raportin e tij me presidentin Trump gjatë mandatit të parë, edhe pse në kandidim tha publikisht që “Zoti mos e dhënë që ai të vijë në pushtet”. Duke iu përgjigjur komentuesve mbi pritshmëritë e opozitës se tashmë që Trump ka riardhur në pushtet i ka ardhur fundi qeverisjes së Ramës, ky i fundit u përgjigj: “Do ta shihni Amerikën, mos kini merak. Do ta shihni edhe marrëdhënien me Amerikën edhe mbështetjen e Amerikës. Do t’i shikoni siç i keni parë, por ju nuk mbani mend.
E keni kujtesën e dobët sepse ju mban këneta peng.
Ju kujtohet që kur mori Trump mandatin e parë që mu çuan mua në Parlament dhe më thanë ik vetë tani se do vijë Donald Trump të të marrë zvarrë! Si vazhdoi puna? Apo kësmet”, tha Rama.
Në fakt, ajo që opozita imagjinonte apo ëndërronte nuk ndodhi. Trump, në katër vjet në pushtet, nuk i solli asnjë kokëçarje qeverisë shqiptare apo Ramës vetë; raporti shqiptaro-amerikan vijoi normalisht.
Por se ç’mund të ndodhë në mandatin e dytë ende nuk dihet, pasi Trump është bërë edhe më i paparashikueshëm. /tesheshi.com/
