Nëse Shqipëria ia doli të presë gjysmë milioni shqiptarë të Kosovës gjatë luftës atje, edhe Europa do t’ia dalë me krizën e refugjatëve. Komentet janë të kryeministrit Edi Rama i cili në një intervistë për edicionin online të gazetës italiane “Corriere della Sera” thotë se Shqipëria do t’I mirëpriste refugjatët nëse do të përballej me një situatë të tillë.
“Mungesa e një politike të qartë në Siri dhe në vendet arabe na ka çuar në një gjendje shumë të rëndë. Shqipëria është një vend shumë i vogël, edhe pse në rritje, kështu që është e vështirë të japim këshilla. Deri tani nuk jemi përballur me këtë sfidë, pasi tendenca është largimi drejt veriut, drejt Gjermanisë. Kur dëgjojmë që ngrihen “muret e turpit” për refugjatët, ne qeshim, pasi në vitin 1999 mirëpritëm gjysmë milioni shqiptarë të Kosovës. I krijuam mundësinë vendeve të NATO-s të lironin Kosovën. Nëse ne e mbajtëm atë dyndje, Europa mund t’ia dalë pa dyshim”, tha Rama. /tesheshi.com/
