Pas një heshtjeje diplomatike, kryeministri Edi Rama ka reaguar për situatën e tensionuar në veri të Kosovës, duke thënë se sulmet ndaj EULEX-it dhe Policisë së Kosovës janë të dënueshme.
“Sulmet mbi EULEX-in janë të dënueshme pa asnjë ekuivok ashtu siç është i dënueshëm çdo akt dhune ndaj policisë së Kosovës. Rishfaqja e barrikadave në Veri të Kosovës bie ndesh me çdo ligj e çdo frymë dialogu e jo vetëm nuk zgjidh asgjë, po përkundrazi komplikon më tej çdo gjë!”, shkruan kreu i qeverisë shqiptare.
Më tej Rama mban dukshëm anën kosovare, duke vlerësuar aktin më të fundit të presidentes Osmani.
“Shtyrja e votimeve nga ana e Presidentes së Republikës së Kosovës është një sinjal kuptimplotë, të cilit autoritetet e larta të Beogradit duhet t’i përgjigjen me të njëjtën frymë dhe ndjenjë përgjegjësie, për moslejimin e përshkallëzimeve të mëtejshme të akteve destabilizuese!”.
Për Ramën, “Beogradi duhet të ushtrojë ndikimin e vet mbi serbët e Veriut të Kosovës, pa i justifikuar assesi veprimet e tyre cilatdoqofshin arsyet! Arsyet diskutohen nuk përdoren si armë kundër policisë e si barrikada kundër rendit ligjor.”
Ndërsa BE-ja, shkruan Rama, “duhet të thërrasë urgjent tryezën e dialogut”. /tesheshi.com/
