Në qeverinë “Rama2” për herë të parë është krijuar Ministria për Sipërmarrjen, e cila do të ketë në focus të saj të gjithë problematikën e bizneseve. Kjo gjë u pohua edhe nga kryeministri Edi Rama në mbledhjen e Asamblesë së PS-së të mbajtur të dielën (27 gusht) ku tha se është e papranueshme që sot ministrat nuk i hapin telefonat biznesmenëve dhe sipërmarrësve. Në këtë kuadër, Rama ngarkoi Sonila Qaton në postin e ministers, e cila duhet të përgjigjet për çdo problematikë të sipërmarrësve.
Nisma duket se është mirëpritur nga shoqatat e bizneseve, të cilat ia parashtruan një kërkesë të tillë partive politike në takimet që zhvilloheshin me grupet e interesit. Për bizneset kjo strukturë duhet të jetë avokate e padrejtësive, si dhe përfaqësuese e interesave të kompanive që operojnë në vend.
Luan Bregasi nga Biznes Albania thotë se kjo është hera e parë që biznesi ka këtë nivel të lartë përfaqësimi.
“Për ne kjo është një kërkesë e realizuar nga qeveria. Mbetet për t’u parë zbatimi i saj në praktikë.
Ne duam që kjo ministri të jetë avokatja jonë e munguar.
Deri tani biznesi ishte i hallakatur në institucionet që duhej t’i drejtohej, sa në Komision Ekonomie, sa në Këshillin Kombëtar të Ekonomisë etj”, tha Bregasi për Vizion+.
Ndërsa Kliton Gërxhani, kryetar i shoqatës ATOA thotë se deri më tani biznesi për çdo padrejtësi shkonte në Gjykatë Administrative.
“Por nuk kemi parë rezultate të prekshme. Ndaj kjo ministri së bashku edhe me gjykatën duke mbështetur njëra-tjetrën do të prodhojnë drejtësinë e nevojshme.
Por ne mendojmë se kjo strukturë do të ndikojë edhe në mbarëvajtjen e punëve, duke nxitur gjerat që mbeten pezull”, thotë ai.
Ndërsa lidhur me reformën e institucioneve, ku disa ministri shkrihen dhe bashkohen me të tjera, biznesi mbështet idenë e një qeverie të vogël dhe me eficente. Por krijimi i disa megaministrive kërkon njerëz profesionistë në sektor kyç, në mënyrë që të shmanget zgjidhja e çdo çështjeje vetëm nga ministri. /tesheshi.com/
