Kryeministri Rama e ka gjykuar protestën e opozitës kundër zgjedhjes së Kryeprokurorit të përkohshëm si rezistencën e radhës së reformës në drejtësi.
“Ishte përpjekje e dëshpëruar për bllokimin e reformës në drejtësi. Shfaqjen e sotme e dha opozita por faturën e merr fatkeqësisht e gjithë Shqipëria, e cila është më afër se kurrë çeljes së negociatave në BE dhe nuk meriton baltën e opozitës që udhëhiqet nga frika e reformës në drejtësi”. tha Rama
Më tej, ai ka renditur precedentën e zgjedhjes së kryeprokurorëve të tjerë ndër vite nga ana e Berishës , duke zgjedhur njëherësh të falenderojë Adriatik Llallën.
“Adriatik Llalla është i pari në 27 vjet që largohet nga detyra pa asnjë konflikt me shumicën në qeveri. Maks Haxhia, Arben Rakipi, Dhori Sollaku, Ina Rama u zgjodhën me miratimin e Sali e Berishës dhe të gjithë u masakruan publikisht, u shanë, fyen, baltosën nga po Sali Berisha dhe partia e tij, sepse u munduan të bëjnë detyrën duke respektuar kushtetutën dhe ligjin. Adriatik Llallën dua ta falenderoj për detyrën. Reformën nuk e ndal dot as me baltë as me tym as me thirrje të dëshpëruara të protestave. Ka dy vjet që bëheni gazi i botës. Sot latë namë në sallën e Kuvendit”, theksoi Rama. /tesheshi.com/
