Kryeministri Rama reagoi sërish lidhur me kritikat edhe politike por edhe mediatike mbi paketën dhe fushatën e ashtuquajtur “Anti-KÇK”, i ndodhur në SHBA për një vizitë zyrtare, shefi i qeverisë shkruan që atje mbi ngacminin nga pyetja e një qytetari.
“’A janë njerëz këta a ça janë?’, më shkruan një qytetar i tronditur nga komentet e studiove televizive kundër paketës anti-KÇK! Eh, kanë kaq kohë që shajnë, akuzojnë, shpifin për lidhjet e qeverisë me krimin dhe mblidhen në sallonet tv sa herë ndodh një vrasje, duke sulmuar qeverinë”, shkruan Rama.
Sipas tij, ajo që po ndodh është një ofensivë shembullore anti-krim.
“Sot që qeveria është angazhuar në ofensivën më shembullore kundër krimit në historinë e vendit, mblidhen në sallonet tv për të mbrojtur krimin nga qeveria që po shkel të drejtat e atyre,të cilët deri dje pa pikën e turpit, i lidhnin me mua, me PS e me çdo fitore elektorale të PS”, shkruan Rama.
Në gjykimin e tij, reagimet negative e kanë burimin nga inati me qeverinë e jo nga ndonjë ndjenjë dashamirësie.
“Njerëz janë njerëz, po janë armiqësuar me të vërtetën, me faktet e me vetë profesionin e tyre për inat të qeverisë! Dhe janë kaq qorrazi kundër qeverisë, sa tani janë kthyer befas në avokatë gjynahqarë të krimit, që po lënë kokrrën e namit me dokrrat e dembelizmit të tyre mendor”, arsyeton i pari i qeverisë. /tesheshi.com/
