Kryeministri Rama ka komentuar për herë të parë mesazhin e lexuar nga presidenti Meta, këtu e para reth dy javësh, atë që pretendonte se i ish dërguar nga shefi i qeverisë, ku ky i fundit i shkruante se Bashës dhe LSI-së do i vinte fundi.
I diktuar nga një interesim gazetaresk, Rama as nuk e pohoi e as nuk e mohoi vërtetësinë e mesazhit, por zgjodhi të bëjë këtë intepretim:
“Për fat të keq të atyre që ende e besojnë këtë opozitë nuk ka nevojë për plane për të eliminuar opozitën, pasi opozita është në kapacitete të plotë për t’u vetëeliminuar dhe procesi i degradimit vijon në një rrugë që e kanë zgjedhur vetë dhe qorrazi dhe çdo ditë hedhin nga një hap”, tha Rama, gjatë një prononcimi pas mbledhjes së kryesisë së PS-së, ku u vendos që Asambleja të mblidhet me datë 22 korrik.
Duke iu referuar ndryshimit të drejtimit politik të Bashkive që drejtoheshin nga PD, kjo pas zgjedhjeve të 30 qershorit, Rama edhe njëherë premtoi se nuk do ketë reprezalje në administratat e tyre.
Kemi parë me kujdes çdo qark, çdo bashki, kemi diskutuar po ashtu për mbledhjen e Asamblesë Kombëtare ku sigurisht do të flasim për çka është bërë dhe atë që do të bëjmë në vijim pas pushimeve, dhe gjëja më e rëndësishme është që kemi hapur një diskutim për ta çuar në një nivel tjetër organizimin e PS-së në funksion të marrëdhënieve më të afërta, më të hapura dhe më efektive me çdo komunitet në funksion të harmonizimit të linjës sonë politike me mirëfunksionimin e bashkive, dhe padiskutim në funskion të një qëndrimi të qartë që e kemi mbajtur edhe gjatë fushatës në çdo bashki që deri dje është qeverisur nga e djathta, për të ndërtuar një proces solid në raport me administratën e për të mos shfaqur asnjë tendencë tradicionale prej pushtuesish në këto bashki, për të respektuar të gjithë ata që sot punojnë në këto bashki, për të mos prekur asnjë grua apo vajzë në radhë të parë që figuron në administratën bashkiake dhe për të pasur transparencë për të gjitha lëvizjet që mund të jenë të nevojshme. Jo në funskion të diskriminimit politik apo larg qoftë pastrimit politik por meritës”, theksoi shefi i qeverisë. /tesheshi.com
