Kryeministri Rama komentoi inisiativën e VV-së, dega Shqipëri, për një marshim Ditën e Pavarësisë, duke e konsideruar atë si një lajthitje.
Më së pari,ai bëri një krahasim: “Parafytyroni një moment, jo ju, po ta përfytyrojnë qytetarët e Kosovës që një degë e Partisë Socialiste natyrisht me miratim nga kryesia dhe nga unë të bëjë protestë, në ditën e Pavarësisë së Kosovës dhe të thotë “nuk është koha për të festuar është koha për të reflektuar” dhe të bëjë një fletë-rrufe që duket sikur është nxjerrë nga printerat e opozitës me qeverinë e Kosovës, çfarë do të mendonin njerëzit në Kosovë? Çfarë do të ishte kjo, në raport me pretendimin për politikë të jashtme të unifikuar dhe për strategji të përbashkët dhe për bashkëpunim?
Megjithatë unë e konsideroj një lajthitje në një proces tranzicioni nga opozita në qeverisje, në një vakum ku kam qenë dhe vetë dhe e kam shumë mirë parasysh, duhet një farë kohe për të bërë kryeministrin sepse kryeministër zgjidhesh ditën kur të votojnë, por fillon dhe bëhesh jo menjëherë pasi ke hyrë në zyrë”, tha Rama në një intervistë për TCH.
VV, nën ethet dhe te fitores në zgjedhjet e 6 tetorit, në pritje për ta qeverisur Kosovën për herë të parë, ka vendosur që promovimin e zgjatimit të saj në Shqipëri ta realizojë Ditën e Pavarësisë, me një të ashtuquajtur “Marshimi i bashkimit”. /tesheshi.com/
