Kryeministri Rama ndodhet në Budapest, si pjesëmarrës në takimin e Komitetit Politik Europian dhe i pyetur nga gazetarët nëse NATO ndihet e kërcënuar nga rikthimi i Trump-it në krye të SHBA-s, ai përgjigj duke thënë se edhe në mandatin e parë kur të gjithë pohonin se do të ndodhte një dobësim i Organizatës së Traktatit të Atlantikut të Veriut krejt e kundërta ndodhi.
“Mënyra si e shoh unë është se është bërë shumë zhurmë ndoshta jo në mënyrën e duhur për kthimin e tij të mundshëm. Përvoja më thotë që kur ishte president dhe të gjithë thonin se NATO do të bëhej më e dobët, NATO u bë më e fortë që kështu le të shohim dhe të mos bëhemi histerikë para se të shohim realitetin. SHBA janë SHBA dhe nuk mendoj që kjo do të jetë domosdoshmërisht e keqe për Evropën”, tha Rama duke theksuar më tej se Shqipëria është vendi më pak i prekur pasi prej vitesh ka pasur marrëdhënie korrekte dhe diplomatike me Shtetet e Bashkuara të Amerikës.
“Besoj se ajo çfarë është thënë, ajo çfarë është diskutuar intensivisht përpara zgjedhjeve evropiane, shkoi shumë larg dhe ndërkohë ajo çfarë ndodhi me zgjedhjet në Shtete e Bashkuara të Amerikës mund të përbëjë një mundësi për të riformësuar shumë gjëra, për ta parë botën paksa ndryshe, për ta parë vetë Europën paksa ndryshem sepse Evropa po bëhet më e vjetër. Ka nevojë për më shumë energji, për më pak rregullime dhe ndoshta është mundësi për të vënë në lëvizje gjërat.
Shtetet e Bashkuara të Amerikës janë Shtetet e Bashkuara të Amerikës dhe në fund të fundit Shtetet e Bashkuara të Amerikës mendoj se janë më të forta se çdokush që është në Shtëpinë e Bardhë, nga njëra anë dhe nga ana tjetër, e thashë: ajo çfarë ka ndodhur në Shtetet e Bashkuara të Amerikës mund të jetë një gjë shumë e mirë për Evropën“, arsyetoi kreu i qeverisë shqiptare.
Kujtojmë se pak vite më parë, kur Trump bëhej gati që të merrte drejtimin e SHBA-së si president, Rama tha publikisht se kjo do ishte fatkeqësi për botën. Por më pas, kur Trump u bë president, Rama ndryshoi qëndrim dhe krijoi raporte të ngushta me administratën e tij. /tesheshi.com/
