Edi Rama është përplasur ashpër me rivalin e tij direkt Lulzim Basha, në Kuvend, duke i kërkuar dy herë llogari se pse Partia Demokratike kishte shkuar dje në Himarë, duke mbrojtur tezën e Athinës zyrtare dhe të opozitës greke “Himara, minoritet grek”.
“Lulzim, eja këtu dhe jepu përgjigje shqiptarëve çfarë donte PD dje në Himarë? Pse e bashkoi PD zërin me ata që nxjerrin bishta pa asnjë bazë, lidhur me një projekt të rilindjes urbane në Himarë. Eja këtu dhe jepu përgjigje shqiptarëve tani, se çfarë është Himara për ty dhe çfarë shkeljesh ka bërë qeveria në përpjekje për ta kthyer nga një Bathore me det në një gji turistik mesdhetar.
Si ka mundësi që PD-ja u shfaq në Himarë të nesërmen e një letre të kryetarit të opozitës greke drejtuar BE-së për gjoja shkeljen e të drejtave të minoritetit grek në Himarë.
Hajde Lulzim trego këtu se çfarë mendimi ka PD-ja për Himarën sepse unë nuk e them me fjalë por e kam thënë me vepra”, tha Rama.
Ndërkohë Lulzim Basha i është përgjigjur Ramës, duke thënë se po strehohet në veshjen e nacionalizmit për të mbuluar drogën dhe krimin.
“Mbrojtje ish-ministrin e Brendshëm nga akuzat që nuk i kishim bërë ne, por antimafia italiane. Miqtë e tu tregojnë me gisht furgonat e policisë dhe thonë ‘këta janë tanët’. Ti e ke për borxh të vish këtu dhe të zhvishesh lakuriq për të hequr vëmendjen. Ti ke mbaruar si kryeministër, ti e di që de facto qeveria jote ka mbaruar punë si kryeministër. Nëse do ta pranosh rrëzimin e qeverisë tënde institucionalisht apo me popullin, kjo të takon ty”, tha Basha. /tesheshi.com/
