Në një takim me krerët e ALUIZN-it dhe Hipotekave, kryeministri Rama iu është përveshur krerëve të këtyre të fundit, duke i paralajmëruar se ç’farë i pret në rast se do ketë ankesa qytetarësh ndaj tyre. Kjo, deri në një formë kërcënuese.
“Vërtet ministrja e Drejtësisë është instanca që interesohet për çdo ankesë, por nga ky moment çdo drejtor Hipoteke do të mbajë përgjegjësi për çdo ankesë të qytetarëve dhe për dhënien në kohë reale të përgjigjes ndaj qytetarit dhe marrjen e masës për kush është përgjegjes që qytetari është vonuar në Hipotekë.
Që do të thotë se nuk duhet të prisni telefonat e koordinatorit të bashkëqeversjes në zyrën e ministres, nuk duhet të prisni që t’ju alertojë ministrja e Drejtësisë, duhet të alertoheni veten në kohë reale duke parë dhe duke ndjekur orë për orë platformën e bashkëqeverisjes për të konstatuar nëse ka ankesë apo kërkesë nga qytetarët për zyrën që ju drejtoni dhe në kohë reale duhet t’i jepni përgjigje qytetarit.
Është e papranueshme që kërkesa të mbajtura 5 vjet nëpër sirtarë të zgjidhen për 3 ditë kur ndërhyn ministrja e Drejtësisë në bazë të kërkesës së qytetarit. Kjo do të thotë që është mbajtur abuzivish, arbitrarisht dhe për këtë është krijuar një kosto shumë e madhe morale psikologjike, financiare, familjare qytetarit ndërkohë që për këtë kosto ka përgjegjësi direkt dhe këta janë individët që kanë përsipër dosjen. Për këta individë ka vetëm një metodë, çuarja përpara drejtësisë. Atje në radhë tek dera e Prokurorisë të përgjigjen pse nuk kanë bërë detyrën”, tha Rama.
Ndërkohë, shefi i qeverisë kërkoi dhe higjenë në institucionet shtetërore. Shteti duhet të përçojë dhe pastërti, tha Rama. /tesheshi.com/
