Kryeministri Edi Rama, deklaroi sot se “vijat e kuqe” nuk janë të vendosura nga ai por nga SHBA dhe BE.
“Nuk është diskutim i brendshëm më, mes PS e PD por është debat mes një qëndrimi strategjik dhe një qëndrimi puro partiak. Qëndrimi strategjik është i yni. Duam ta shembim këtë sistem drejtësie. Ky draft e shemb por pa vetingun e pavarur ndërton nëj shtëpi të re ku futen xhagajdurët e vjetër. Këtë nuk e pranojmë dot.
Nuk mund të bëjmë reformë që tia hedhim BE-së. Reforma duhet të marrë vulën e BE-së dhe nuk e merr vulën duke i çuar në tavolinën e Brukselit të shkruar në SHQUP-isht apo Socialist 88-tën. Nëse ata do ta lexonin 88 siç e lexon SHQUP atëherë s’ka asgjë”, tha Rama.
Në një konferencë për mediet, pas takimeve që pati me kreun e Kuvendit, Ilir Meta, si dhe me ambasadorin e Shteteve të Bashkuara, Donald Lu, kryeministri Rama ka theksuar se sot ka ardhur momenti i së vërtetës dhe i ndarjes së të shkuarës nga e ardhmja.
“Ka ardhur momenti që vëllazëria në krim mes politikës dhe gjyqësorit të prishet dhe të mos pranojmë më që gjykatës, të cilët kanë liruar kriminelë, të kalojnë testin e radiografisë”, tha Rama, duke iu referuar procesit të quajtur “vetting”.
I nxitur nga pretendimet e Partisë Demokratike për “moskapje të drejtësisë nga politika”, kryeministri Rama është shprehur se pikërisht mosfutja e duarve të partive në procesin e skanimit dhe vlerësimit të anëtarëve të sistemit të drejtësisë është shkak, që shumica qeverisëse ka pranuar mosemërimin e gjykatësve me shumicë të thjeshtë dhe as me 3/5-tat, por me 2/3-tat.
“PD-ja vazhdon të tregojë përralla nga frika e Reformës në Drejtësi. E dimë shumë mirë që të 9 anëtarët e Gjykatës Kushtetuese janë zgjedhur nga qeveria e PD-së, ndërsa 16 nga 17 anëtarët e Gjykatës së Lartë po ashtu janë zgjedhur prej qeverisë së shkuar. Shumë prej tyre madje janë zgjedhur edhe me shumicë të thjeshtë, jo më me 3/5-tat për të mos folur me 2/3-tat”, theksoi Rama.
Sa i përket kapjes së këtij sistemi, që Rama e quajti të kalbur, për këtë kryeministri tha se më mirë se kushdo në politikë e dinë familjarët e viktimave të 21 Janarit, ata të Gërdecit, por edhe pronarët e ligjshëm dhe të zhveshur nga çdo pronë me vendime të tmerrshme gjykate. “Ky nuk është një sistem drejtësie, – theksoi Rama. – Por një pazar i madh ku drejtësia shitet”. Këtu, Rama nuk harroi të përmendte edhe faktin që kreu aktual i Partisë Demokratike, Lulzim Basha, i ka ikur gjykimit të një çështjeje me një raport mjekësor, e ajo çështje u mbyll më pas për procedurë.
/tesheshi.com/
